السلام عليكم ورحمة الله وبركاته
يسعد مسائكم / صباحكم
الحمد لله على سلامة كل من سافر ورجع
والحمد لله على سلامة كل من سوى عمليه ليزك
وصارت وحده من عيونه يبغالها عمليه ثانيه
الله يسهل يارب
تصدقون عملية الليزك ماتوقعهتا كذا
كنت خاااااااااااااااايفه بقوه
دخلت غرفه مافبل غرفة العمليات
وكان في استقبالي ممرضه فلبينيه حفظها الله
لبستني لبس العمليات وضفت كشتي ولبست كمامات
وجلست وبإنتظار من يناديني
وماغير ابلع ريقي من الخوف وافرقع اناملي <<
وكان فيه مريضه تسوي العمليه قبلي
ومااسمع الا صوت الدكتور يقول لها خليك ثابته لا تتحركين
وانا قلبي يرقع شي مصري وشي يمني تشكيله يعني
قلت لنفسي : الباب ومفتوح شكلي بنحاش
قالت لي نفسي : مهبوله انت تنحاشين اوخوك جالس عند الباب يحتريك اذا طلعتي وش بتقولين له
انا : بقول هونت ماابغى اصلح عمليات والنظارات ماشي حالها
نفسي : والثمانيه الي انت دافعتها
انا : يرجعونها لي
نفسي: انطقي بس وخليتس حرمه
انا : تخيلي يعني لو خربوا عيوني ولا شفت
نفسي : طيب تخيلي لو شفتي زين
انقطع حديثنا بخروج المريضه خلصت عمليتها
وعيونها حمر وتمشي بشويش
واقول لنفسي ياحظها خلصت ماشاء الله
سالتها كم جلستي في العمليه قالت ولا ثمان دقايق
والممرضه الي معها تقولي عشر دقايق كل عمليه
<< اكمل ولا اسكت اصرف لي << حركات ري ري رته
ري ري رته والله شكلتس ماتاكلين جرجير ابد
هذا نقص الجرجير مأثر عليتس
ايوه نرجع لمحور حديثنا
وفتحت الباب ممرضه ونادتني
قلت لنفسي جاك الموت ياتارك الصلاة
دخلت غرفه تروع الطيب
وسريرهم بشع
جلست وقلت لدكتور بشويش علي انا حساسه جدا
ضحك ضحك مكر وقال لا تخافين
وقعد يبربر علي الي ان هدت اعصابي
وبدت العمليه والوقت بالنسبه لي يمشي بشويش
والحمد لله خلصت بسلام
ويوم طلعت لقيت حرمه تحتري دورها وشكلها خايفه
ضحكت عليها وقلت مسيكينه خايفه
لبست عباتي وطلعت
واذا بأخوي وابتسامته المشرقه
اخذ قطراتي
وطسينا للبيت
وفي نهاية المطاف لا يسعني الا ان اشكر خادم الحرمين << حركات هالسعوديين الي ماادري وش تبغا
الموضوع في ماله دخل فيهم وهو لايزال يشكرهم
مثال بسيط :
حرمة تصلح له الغداء وهو يشكرهم
^^
بدت تستهبل
الحمد لله على هذي النعمه
وترى صح النظارات نعمه بس الليزك انعم واكرم
يالي تلبسون نظارات لا تفوتكم
اسالوا مجرب
تحياتي للجميع
الأحد أغسطس 17, 2008 4:50 pm
